“Aprel döyüşləri – Suverenliyimizin tam bərpasına gedən yolun başlanğıcıdır” adlı tədbir keçirilib.

 02 aprel 2025-ci il tarixində Xızı Rayon İcra Hakimiyyətinin təşkilatçılığı, Yeni Azərbaycan Partiyası Xızı Rayon Təşkilatının və  Abşeron-Xızı Regional Gənclər və İdman İdarəsinin Gənclərlə iş üzrə Xızı rayon sektorunun iştirakı ilə Azərbaycan Respublikasında 2025-ci ilin “Konstitusiya və Suverenlik İli” elan edilməsi haqqında Azərbaycan Respublikası Prezidentinin Sərəncamına uyğun olaraq Mikayıl Müşfiq adına Giləzi qəsəbə tam orta məktəbinin akt zalında aprel döyüşləri qəhrəmanı şəhid Ravil Novruzovun anım günü münasibətilə “Aprel döyüşləri – Suverenliyimizin tam bərpasına gedən yolun başlanğıcıdır” adlı tədbir keçirilib. Tədbirdə məktəbin şagird və müəllim kollektivi, rayon ictimaiyyətinin nümayəndələri və şəhid Ravil Novruzovun atası Elman Novruzov da iştirak edib.

       İlk öncə  Vətən uğrunda dünyasını dəyişən bütün şəhidlərin əziz xatirəsi 1 dəqiqəlik sükutla yad edilib. Tədbiri giriş sözü ilə açan Xızı Rayon İcra Hakimiyyətinin İctimai-siyasi və humanitar məsələlər şöbəsi müdirinin müavini-dini qurumlarla işin təşkilatçısı Abdulla Hüseynov Azərbaycan dövlətinin, dövlətçiliyinin dönməzliyinin, Azərbaycan əsgərinin gücünün, qüdrətinin ifadəsi kimi tarixləşən Aprel döyüşlərində ordumuzun göstərdiyi şücaət və qəhrəmanlıqdan və sonralar ərazi bütövlüyümüz uğrunda davam edən vətən  müharibəsində xalqımız və ordumuzun birlikdə əldə etdiyi parlaq tarixi qələbədən bəhs edib. Həmçinin bildirib ki, Aprel döyüşləri bizim şanlı hərbi qələbəmiz –  dövlətimizin, xalqımızın və ordumuzun gücünü göstərən mükəmməl birliyin rəmzidir.

       Daha sonra, bu döyüşlərdə qəhrəmancasına şəhid olmuş Azərbaycan Silahlı Qüvvələrinin giziri şəhid Ravil Novruzovun həyatından və vətənin ərazi bütövlüyü uğrunda yorulmaz fəaliyyətindən bəhs edən çıxışlar dinlənilib.

      Tədbirin sonunda  Azərbaycan Silahlı Qüvvələrinin giziri şəhid Ravil Novruzovun ailəsi və Giləzi qəsəbəsində yerləşən məzarı ziyarət olunub.